Маласо шкастонть Татьяна Тимофеевна аноксты Московсо Мордовиянь читнень ютавтомантень. Республикасто тов моли покш делегация, ков совить артистт, содавикс ломанть. Истя жо эряви ютавтомс Славянонь письменностень ды культурань чинть, мейле карми Акша Келу, Сабантуй ды ламо лия покшчить. Сехте учовиксэсь жо – эрзянь ды мокшонь раськенть Россиянь лия раськетнень марто вейсэндявомань 1000 иень тешкстамось.
Пек лембестэ ледстни Татьяна Тимофеевна вечкевикс ялгадонзо. Те: Вера Чекайкина ды Мария Коянкина. Эйкакшпингстэ саезь ды те шкас сынь паро ялгат. Нейгак пейдезь ледстнить, кода Татьяна Тимофеевна салсилизе лелятнень «Восход» мотоцикланть. Озавтылинзе удалонзо ялганзо ды сыргильть экшелямо. Нама, мейле понгониль тензэ лелятнень пельде. Ансяк сон зярдояк ды кидеяк а пели. Кодамо ульнесь эряза – истямо сон кадовськак. Аватне сеедьстэ вастневить, явить кенярксост ды апарост.
Татьяна Тимофеевнань кавто эйкашонзо: Светлана тейтерезэ ды Иван церазо. Сынь кавтонест прядсь музыкальной школат. Света ней вана пряды национальной культурань институтонть, Иван тонавтнесь аграрной интститутсо, машты баянсо ды гитарасо седямо, мороткак морси, кода авазояк. Седеяк покш кенярксозо Татьяна Тимофеевнань – Матвей нуцькинезэ, конань кавто пель марто иеть (Светань церынезэ).
– Те важодемась пек тукшны мелезэнь. Апак сепо мерян – эсь важодемам вечкса. Вастневан ламо ломань марто, ардтнян регионга. Нама, аволь сатышка шка кадови явомс мель малавиксэнь туртов. Мон бажан кенеремс эрьва ков, – мизолкс марто корты Татьяна Тимофеевна.
Эрзянь ды мокшонь раськень культуранть, келенть, койтнень-кирдатнень ванстомасост, кепетемасост вадря важодеманть кисэ Татьяна Тимофеевнанень максозель «Мордовия Республикань Культурань заслуженной роботник» лемесь (2010 ие).
Нейгак, арась истямо чи, зярдо бу мезеяк аволь юта. Эрьва чи организационной тевть, вастовомат творческой ломантнень марто, минек народной мастертнэнь марто важодема.
Т.Т. Ширманкина – «Тев» финнэнь-угрань раськень народной художественной промыслатнень ды ремеслатнень весероссиянь выставка-ярмунканть организатор ды куратор. Республикань мастертнэнь экспозициятне невтевить «Ладья» ды «Жар-птица» весероссиянь выставкатнесэ-ярмункатнесэ (Московсо), сынст пурны ды важоди мартост Татьяна Тимофеевна. Эрьва ие сынь сайнить призовой таркат.
Татьяна Тимофеевна ульнесь сетнень ютксо, кить кармасть ютавтомо эрзянь истят койтнень, кенярксчитнень, кода: «Эрзятнень сюпавчись», «Роштовань кудо», Кизэнь вешнемат», «Мастянь чи», «Раськень озкс» ды «Велень озкст».
Теде башка, сон арси «Равось – ояксчинь лей» проектэнть. Ютавты экспедициянть маршрутсо эрзятнень ды мокшотнень марто вастовомат, конатнень пингстэ сермадстовить творческой вейсэнь важодемадо тевконевт, национально-культурной автономиятненень максови эрьва кодамо лезкс.
Седеяк ламо тевть появась, зярдо кармасть тешкстамо Мордовиянь культурань чить Россиянь регионтнэсэ. Татьяна Тимофеевна аноксты программат, кемексты сюлмавкст енкстнэнь марто, пурны тов ардомс делегацият. Истя, Мордовиянь чить ютавтозельть Ульяновск, Пенза, Самара, Челябинск, Калининград, Саратов, Тюмень, енкстнэсэ, Приморской крайсэ, Татарстансо, Башкортостансо ды лия таркасо.
Важодемадонть ды тевтнеде кармасть седеяк ламо. Ансяк те авась а пели сындест. Эрьва тевсэнть лаказь лаки. Национальной политиканть кепеди аволь ансяк минек республикасо, сонзэ томбалеяк. Зяро уш иеть ардтни сеть енкстнэва, косо эрить эрзятне ды мокшотне: Пенза, Нижний Новгород, Самара, Казань, Саратов ды лият). Важоди национальной центратнень, ассоциациятнень, национально-культурной автномиятнень, общественной вейсэндявкстнэнь марто.
Кода сон важоди, пии-палы тевсэнзэ – редизь МР-нь национальной политикань коряс государственной комитетсэ. Ды тердизь важодеме эстест – консультантокс. Истя, 2005-це иестэ саезь Татьяна Тимофеевна важоди тесэ.
Училищанть прядомадо мейле Татьяна Тимофеевна сась Саранскоев. Лиссь мирденень. Кармась важодеме ошонь Ленинской культурань кудосо киштемань кружоконь ветицякс. Мейле ютавтызь Октябрьской райононь культурань кудонь прявтокс. Теке жо шкане сон тонавтнесь заочна МГУ-нь национальной культурань факультетсэ. Кемнилее иеть важодсь тосо. Теде мейле ладязель Октябрьской райононь культурань отделэнь прявтокс. Весе те шканть перть сон морсесь эсест Пакся Тавла велень «Норовава» ансамблясо.
Стройотрядтнэнь марто Татьяна Тимофеевна пачколесь Кубанев. Тосо сынь лездасть пурнамс умарть-мезть. Ледстнематнеде кадовсть пек ламо. Велявтомс бу се шканть, ды а велявтови…
Школань прядомадо мейле Татьяна Тимофеевна мольсь тонавтнеме Орданьбуень кульпросветучилищав. Сонзэ прядызе якстере диплом марто. Тосояк эсь прянзо невтизе. Ютавтнесть эрьва кодат мероприятият. Татьяна Тимофеевнань ледстнеманзо коряс, се шкась ульнесь пек валдо ды мельстуиця, од пора. Ялгатнень марто якасть БАМ-ов. Ковонь перть сынь невтнесть концертт чугункань кинь теицятнень икеле. Тестэ мартост истя жо якасть минек писательть ды поэтт. Васоло енкстнэсэ вастсть эсенек раськень ломанть. Эрзят ды мокшот. Кодамо кеняркс марто сынь аштесть, а евтавияк.
Уш школасо тонавтнемстэ саезь, Татьяна Тимофеевна ульнесь пек активной. Киштиль ды морсиль эрьва покшчисэ. Школасо якась «Синие дожди» вокально-инструментальной ансамбляв. Пек вечксь моротнень ды спортонть. Сон эрьва косо бажась улемс васенцекс. Сокссо якамонть коряс пелькстамотнестэ грамотатне ванстовить нейгак.
Татьяна Тимофеевна чачсь-кассь Кочкурбуень Пакся Тавла велесэ. Семиясост трявсть кото эйкакшт. Весе лелят ды ялакст, Таня ськамонзоль тейтерне. Аванзо, Надежда Андреевнань туртов – васенце лездыця. Зярс авазо важоди фермасо, тейтересь топавтылинзе кудоютконь весе тевтнень: кардазсо андылинзе скалонть, тувотнень, явавтылизе каштомонть, ламо котьмиль пиресэяк. Тетязо трактористэль. Мерема, сынст семиясо ламот кочкизь те профессиянть. Лелятнеяк трактористэкс ульнесть. Тракторонь ветямо машты Таняяк! Сон аволь весть полавтылизе тетянзо, кона сыль пек сизезь веть роботамсто.
Кодат ансяк эрзянь ды мокшонь покш кенярксчить, вастовомат, чокшнеть а ютыть Мордовиясо. Пек сеедьстэ сави неемс сынст эйсэ Татьяна Тимофеевна Ширманкинань. Те эрзянь авась важоди Мордовия Республикань Национальной политикань министерствасо. Секс весе неть мероприятиятнесэ сон – арсиця-пурныця, ютавтыця. Корты эрзякс парсте, мазыйстэ, келенть содасы вадрясто. Чамасонзо свал чевте мизолкс, конань каршо тон а кирдеват, истя жо мизолгадат.
Эрзянь мазый ды превей аванть чачома чи марто!
Эрзянь мазый ды превей аванть чачома чи марто! - Голос эрзи
Комментариев нет:
Отправить комментарий